Новиот претседател на СДСМ се бира од веќе познати, истрошени и кадри поврзани со низа скандали кои беа дел од раководството кое го доживеа историски најголемиот изборен дебакл – Венко Филипче, Славјанка Петровска и Јован Деспотовски поднесоа кандидатури. Но, има и друга опција – политичкиот анонимус Златко Ристовски кој доаѓа од паритскиот огранок од Битола.
Поранешниот министер за здравство Филипче кој зад себе ги има пожарот со модуларната болница но и целосно распаднатиот здравствен систем сега влегува со амбиција да ја врател партијата на вистинската насока. Горд е што бил близок со Заев, но вели ако бил избран за претседател ќе докажел дека нема да биде негова сенка.
-Добро јас слушам многу коментари во врска со поддршката од Зоран Заев. Доколку бидам избран за претседател јас за многу кратко ќе докажам дека ќе владеам целосно со мојот интегритет и достоинство. Тоа што имам одлични релации со Зоран Заев пред се говори за мене. Јас имам одлични релации и со останатите други претседатели претходни на партијата, со други претходни функционери, изјави Филипче.
Партијата се уште нема направено ниту анализа на катастрофалните изборни резулати, а веќе говорат како ќе работеле во идина. За партиски реформи ќе се бори и довчерашната министерка за одбрана и една од најблиските соработнички на Димитар Ковачевски, Славјанка Петровска која предизборно склучи скандалозен договор за набавка на хеликоптери вреден 230 милиони евра. Вели партијата се наоѓа во најнезавидна позиција од своето постоење и за тоа не смее да се молчи.
-Ни една причина за овој пораз кој сега го доживеавме не смее да остане скриена и не смее да остане да виси, да лебди некаде, затоа што за жал тоа ни се случи во 2021-ва година, кога тогаш се сметаше дека само со повлекувањето на тогашниот претседател Зоран Заев ќе се надминат некои пропусти, но очигледно дека требало посериозна реформа, изјави Петровска.
Во битката влегува и се уште актуелниот директор на ТИРЗ, Јован Деспотовски кој претходно беше прв човек на во Фондот за иновации со кој се поврзуваа низа скандалозни афери за поделба на грантови. Сега ветува дека ако не победи на изборите, нема да оди на ниту една партиска фунцкија, а тоа го побара и од другите кандидати, кои не ја прифатија таа идеја.
-Нов почеток, нов СДСМ, конкретни чекори, конкретни работи за сите луѓе. Професионализацијата на партијата значи дека ќе вклучиме многу луѓе кои не се дел од партиските структури, меѓутоа нема да ги заборавам и старите структури. Предвиден е посебен форум во кој што сите поранешни функционери, сите поранешни носители на партиски или на јавни функции, кои што ја обавувале таа дејност со достоинство и кредибилитет ќе бидат системски интегрирани, не преку пазар, туку преку конректна форма која што е преточена преку еден совет на искусни, изјави Деспотовски.
Рокот за поднесување кандидатури за иден лидер на СДСМ е до шести јуни. Внатрепарските непосредни избори, на кои право на глас има целото членство, ќе се одржат на 30-ти јуни, кога партијата ќе го добие наследникот на Ковачевски, кој најави дека нема да поднесе кандидатура.
Матеја Петровски
