Минималната плата се зголенмува за 1.667 денари. Од овој месец ќе изнесува 26.046 денари. Ова е законското усогласување согласно трошоците за живот кои биле поголеми за 4,1% и просечната плата која во просек се зголемила за 9,6% минатата година. Премиерот Мицкоски oчекува дека на следната владина седница утре таа да помине на влада и од април да почне да се исплатува.
„Се што е во рамките на институциите, институционален дијалог треба да се охрабри, затоа што само така може да се дојде до конструктивно решение. Вонинституционални механизми секогаш постојат, демократска држава е Македонија, но ценам дека искуство вели дека се што е во рамки на институциите носи решение. А се што е надвор од рамките на институциите, мислам дека не само што не носи решенија, туку апсолутно ги поларизира нештата, дециден е Мицкоски“ – вели Христијан Мицкоски – претседател на Влада.
За претседателот на Сојузот на синдикати и ова не е доволно. Тој ја напушти седницата на економско-социјалниот совет порано од предвиденото. Револтиран бидејќи само ги информирале синдикатите за законското усогласување, но не се разговарало за барањето на ССМ за минималец од 600 евра и пораст на останатите плати за 100 евра. Тој најави дека работниците ќе излезат на улица, односно на протести кон средината на март.
Министерството за економија и труд ја состави и просечната потрошувачка кошничка. Таа изнесува 56.493 денари и е за 9 илјади денари помала од минималната кошничка која ја утврдува синдикатот. Оваа ставка ќе биде основа за креирање на економските политики, особено оние во делот на пазарот на трудот.
Потрошувачката кошничка на Министерството за економија содржи дел за храна и пијалоци во вредност од 22 илјади денари, облека и обувки во вредност од 2,650 денари. Министерството пресметало дека за домување се троши 3.100 денари, за мебел и покуќнина 4.800, а з аодржување на здравјето 1.430 денари. Одредени ставки треба да се доуредат, за конечно да се добие и презентира потрошувачката кошничка пред јавноста.
