Широка дебата за сите засегнати страни, а не брзо законско решение кое може да падне на Уставен и повторно да нема решение за правичната застапеност на сите етнички заедници во администрацијата. Ова го порача министерот за јавна администрација Горан Минчев во врска со укинувањето на балансерот, алатката за вработување во државниот сектор според нациoнална припадност. Тој е дециден дека решение сигурно ќе има бидејќи правичната застапеност во институциите е уставна категорија која мора да се почитува.
Во првите 100 ден аод мандатот на новата Влада, Министерство за јавна администрација изготвило стратегија и направени се конкретни чекори за реформи во јавниот сектор.
Повлечени се законот за административци, за нивниот професионален развој и за вработувањето во јавниот сектор за да одат на ревизија. Како што соопшти министерот, ниту еден административец нема да биде избркан од работа, но ќе мора да се дообразува на Академијата за административци која допрва ќе биде формирана. Минчев посочи дека проблемот не е во пренатрупаноста на административците во институциите, туку во нивната некомпетентност и нестручност. Балансерот и партиските вработувања во псоледниве 30 години произвеле неквалитетна администрација која не пружа услуги, подвлече министерот.
За наредната година во план е министерството да се занимава со Законот за висока раководна служба според кој треба да се воведе практика која е спротивна од сегашната, а таа е политичките партии да не избираат свои кадри, туку да се изберат најкомпетентните кандидати според нивните заслуги.
Овој закон беше подготвен од поранешното Министерство за информатичко општество, но никогаш не беше усвоен на владина седница од претходната власт, ниту влезе во собраниска процедура.
