Местото каде најмногу просперираат ќерки, синови и сопруги на функционери, Академијата за судии и јавни обвинители, повторно сред скандал. Од 130 места за идни судии и обвинители, слободни се само 30 бидејќи останатите се поделени во коалициски договор помеѓу партиите, обвинува опозицијата. 25 се места на ДУИ, 20 за Алијанса, 45 на СДСМ и 10 за помалите коалициони партнери, пишува на Фејсбук пратеникот Антонио Милошоски повикувајќи се на извор од академијата.
Од вкупно 130 идни судии и обвинители, според изворот од АСЈО, на Академијата ќе бидат запишани:
25 од листата утврдена од страна на ДУИ
20 од листата на Алијанса
45 од листата на СДСМ и
10 од помалите коалициони партии.
Останатите 30 судии и обвинители ќе бидат избрани од најдобрите меѓу преостанатите 200 пријавени кандидати, пишува Антонио Милошоски, пратеник на ВМРО ДПМНЕ
Правосудството одамна го допре дното, судејќи по критиките на меѓународната заедница и довербата од 2 % што е на ниво на статистичка грешка, но премиерот Ковачевски за писменото полагање во Академијата и обвинувањата дека предизборно се селектираат кандидати, медиумите ги препрати на друга адреса, во Академијата.
Од таму пак, со денови молчат. Директората Наташа Габер неколку дена како да е пропадната во земја и не одговара на прашањата во врска со техничкиот проблем за електронско полагање, кој ќе се реши со писмен тест. За неа, доволно е јавноста да биде информирана само преку веб страната на Академијата.
Токму Габер, во месец март тврдеше дека електронското полагање дава сигурност за независен избор на кандидатите.
Летоска, власта се пофали дека Европската комисија аплаудира за последните законски измени за Академијата во однос на поригорозните критериуми за упис. Не поминаа неколку месеци и аплаузот е бадијала, со оглед на тоа што новите измени носат полесен пат за упис во академијата.. Власта на време не набавила софтвер за полагање на испити во државните инстируции, па според неа, хартиените тестови се вистинското решение.
Оваа Академија од нејзиното формирање во 2006 е под постојан удар на критики, а во последниве години цажи за царство на непотизам и расадник на судии и обвинители од кои , повеќе од половината се деца на функционери.
