Имајќи ги предвид геополитичките тенденции и случувања, потребно е процесот на проширување на Европската унија да продолжи и Македонија да го продолжи својот пат кон полноправно членство во ЕУ, оценија на денешната средба потпретседателот на Собранието, Антонијо Милошоски и францускиот амбасадор во земјава, Кристоф Ле Риголер.
На средбата, како што информира собраниската прес-служба, се разговарало за продлабочување и унапредување на соработката меѓу двете држави и за приближувањето на земјата кон членство во ЕУ.
Потпретседателот Милошоски ги поздрави традиционално добрите и пријателски односи меѓу Македонија и Француската Република при што нагласи дека меѓу двете држави постои отворен и конструктивен дијалог и континуирано унапредување на соработката во многу сфери од заемен интерес. Во изминатите години, рече, се забележува динамизирање на политичкиот дијалог на високо и највисоко ниво, кој е конструктивен и пријателски.
Амбасадорот Риголер истакна дека Француската Република ја има усвоено Стратегијата за Западен Балкан за да ја поддржи Европската унија во приближување на регионот кон Европа, како и за да го зајакне политичкиот дијалог со земјите во регионот.
