Микро, малите и средните компании се столбот на македонската економија и со соодветна поддршка можат да генерираат раст од пет до седум проценти, оцени претседателот на Агро бизнис комората при Сојузот на стопански комори на Македонија (ССК) Горан Ѓорѓиевски на денешниот настан по повод одбележувањето на Денот на коморите под мотото „Економија и проекти – сегашност и иднина“.
Ѓорѓиевски нагласи дека инфлацијата останува на ниво од околу четири проценти и оти проектирани два и пол проценти за наредната година ќе бидат тешко достижни доколку не се засилат структурните економски процеси и не се поддржи продуктивноста во реалниот сектор.
-Сите индикатори покажуваат дека инфлацијата ќе продолжи во оваа димензија. За нас е важен и растот на бруто-домашниот производ, а компаниите веќе покажуваат раздвижена деловна активност. Но треба да се продолжи подлабоко и посилно, рече Ѓорѓиевски.
Потенцираше дека микро, малите и средните претпријатија сочинуваат 97 проценти од економијата и создаваат околу 80 проценти од БДП за разлика од поголемите компании кои учествуваат со 20 проценти. Според него, фокусот на економските политики мора да остане на стимулација на овој сегмент, кој има потенцијал да генерира висок и одржлив раст.
Како клучни проблеми со кои се соочува бизнис-секторот, претседателот на комората ги наведе недостигот од човечки ресурси, пристапот до финансии и ниската продуктивност во компаниите.
-Недостигот на работна сила е сериозен. Образовниот систем создава кадар кој не е апликативен за реалниот сектор и потребни се радикални мерки. Од 2017 до 2024 година имаме раст на вработеност од 1,4 проценти, а продуктивноста пораснала само 1,01 проценти. Значи, се вработува, но не се создава продуктивност, истакна Ѓорѓиевски.
Дополнително, според него, потребно е продолжување на финансиските инструменти како што беше унгарската кредитна линија, како и воведување комбинирани модели со грант-шеми по примерот на земјите од Европската Унија.
-Само така може да се подигне продуктивноста, а без тоа малите компании не можат да издржат. Трошоците растат, а без инвестиции во технологија, автоматизација и дигитализација тие се префрлаат во финалната цена, појасни Ѓорѓиевски.
Говорејќи за најавениот нов бран иселување на работна сила во март следната година, тој предупреди дека компаниите ќе се соочат со уште поголем дефицит на стручни кадри. Во моментов, како што наведе, околу 10.000 странски работници од источни земји се ангажирани во македонската економија, но нивната стручност често не одговара на потребите на бизнисот.
-Прво треба да се исцрпи потенцијалот на домашниот кадар. Инаку ќе следи барање за целосна либерализација на увоз на работна сила, што делумно веќе се случува, додаде Ѓорѓиевски.
Апелираше дека образовниот систем мора да креира профили во согласност со реалните потреби на економијата, бидејќи, како што рече, „постојат фрапантни информации дека се создаваат погрешни кадри само за да се зачуваат одредени работни места“.
-Човечкиот капитал е најважен ресурс, но мора да биде поврзан со продуктивност. Ако компаниите не можат да инвестираат во современа технологија и дигитализација, тие не можат да ги апсорбираат зголемените трошоци и тоа се рефлектира во финалната цена на производот, порача претседателот на Агро бизнис комората при ССК.
