Време е да се воведе ред во руинираниот македонски правосуден систем преку коренити промени кои ќе значат „почеток на крајот“ – дециден е претседателот на Владата, Христијан Мицкоски кој најави итни реформи во правосудтсвото. Според него кочница за разрешување на членовите во Судскиот совет е законот и затоа тие не можат да бидет разрешени, но борбата за промени ќе биде со јавниот притисок – вели премиерот.
„Органот кој ги избрал тие пет члена има право да даде свое мислење. И со тоа што не го прифатил нивниот извештај, дал свое мислење. Пратениците можат да поднесат интерпелација за членовите кои тие ги избрале. Но тоа не значи дека им престанува мандатот, тие може да речат дека не поднесуваат оставка и да останат понатаму да го водат судството со 2%. Нас тоа нема да нѐ изненади. Со сила не можеме ништо да им направиме, до последно ги штити законот. Тие можат да решат да не поднесат оставка“, рече Мицкоски.
Премиерот ги повика сите парламентарни политички партии заеднички да работат на реформите во судството. Во фокусот на промените ќе биде Советот на јавни обвинители.
Владејачката партија заедно со парламентанрното мнозинство пред два дена и официјално ја поднесоа иницијативата за разрешување на пет члена од Советот кои се избрани од Парламентот.
Судството кое ужива само 2% доверба е мета на критики – и на јавноста, и на експертите, и на меѓународните институции – а токму судскиот совет е една од институциите за чии сериозни недостатоци ЕУ постојано предупредува. Според власта овие забелешки се од клучно значење за процесот на реформи во правосудството и напредокот на Македонија. Затоа, решавањето на овие предизвици е неопходно за враќање на довербата во судскиот систем и за зацврстување на владеењето на правото.