Економијата се стабилизира, платите растат. Единствена катастрофа за Македонија е седумгодишното разбојничко работење со државни ресурси на СДСМ и ДУИ, а не прогнозата на Светска банка за економијата на државава во најновиот извештај што опозицијата ја препознава. Вака премиерот Христијан Мицкоски ги коментира обвинувањата од опозициската СДСМ дека оваа влада ќе направи економска катастрофа.
Пратеникот на СДСМ и екс вицепремиер Фатмир Битиќи вели дека Македонската економија е во слободен пад и наместо очекуваниот економски раст од 2,5 проценти, годинава, според Светска Банка, ќе ја завршиме со само 1,8 отсто раст на БДП. Тоа според него е јасен сигнал дека економските политики на ВМРО-ДПМНЕ се целосно неуспешни.
Мицкоски вели дека Владата преку соодветни мерки успеала да го запре слободниот пад на економијата.
Од владејачката партија велат дека за само два месеци од формирањето на владата во земјава дојдоа четири странски инвестиции, од кои само една е во вредност од над 500 милиони долари, и носи над 1500 вработувања.
Исто така пензиите се зголемени линеарно за 5000 денари, а во нареден период следи зголемување на платите на просветните работници ќе достигне 46%.
