Судиите и обвинителите не ги заслужуваат ниту сегашните плати, камо ли покачување. Премиерот Мицкоски не попушта. Вели, владата е целосно посветена на реформите, но делот од Реформската агенда кој се однесува на зголемување на буџетот во судско-обвинителскиот систем не може да се спроведе.
Потребни се суштински промени, со кои судството и обвинителството ќе се ослободат од канџите на политиката и влијанието од одредени центри на моќ, па потоа ќе се зборува за покачување.
„Моите ставови за Обвинителството и судството се одамна кажани и разговарани. И секогаш кога ќе зборуваат зошто доцниме во процесот за реформи, сакам јавноста да знае дека станува збор за шест закони кои се однесуваат на зголемување на буџетот, односно нивните плати. А ова го бараат тие кои имаат само два проценти доверба. Јас чувствувам мачнина, бидејќи тие не ги заслужуваат ни овие плати поради ваквите пресуди. Суштинската реформа е токму тоа – законите се за зголемување на буџетот. Не е проблем, ќе го зголемиме и за трипати, ама прво нека заслужат“, изјави премиерот Мицкоски.
Од областа на правосудниот систем се работи на повеќе закони меѓу кои и законите за Јавни обвинители, Судски совет, за обвинителска служба, судска служба. Треба да се менува и Кривичниот законик и Законот за кривична постапка. Дел од нив согласно препораките од Брисел предвидуваат и од буџетот да се одвојуваат 0,8% за судството и 0,5% за обвинителството, што автоматски ќе значи и покачување на нивните плати.
Од шестте закони предвидени во судско-обвинителската сфера, само ова е пречка за да влезат во процедура. Според проценките на Мицкоски тоа би значело трошок од 100 милиони долари годишно – двојно повеќе од постоечкиот.Владата претходно најави дека ќе направи компаративна анализа со неколку земји членки од ЕУ, како Франција, Германија, Унгарија, Хрватска, да се види колку тие земји одвојуваат од буџетот, по што ќе најдат адекватно решение. Законите треба да се донесат најдоцна до крајот на годинава.
