Ако продолжат да се служат со трикови и да водат инает, народот ќе се самоорганизира и ќе им се случи народ. Ова е предупредувањето на премиерот Христијан Мицкоски до членовите на Судскиот совет кои и покрај изгласаната недоверба од пратениците немаат доблест да си поднесат оставка. Мицкоски вели дека народот е желен за правда, но неколкумина од судскиот систем се уште стојат на браникот на партиите од претходната власт СДСМ и ДУИ и немаат намера да си одат.
Мицкоски вели дека сосема е јасно тоа што го прават дел од членовите на Судскиот совет бидејќи се исплашени за да не ги изгубат своите големи плати. Тој потсети дека граѓаните и во наредните месеци ќе ги плаќаат членовите и покрај тоа што тие треба да покажат доблест и да си одат.
Иако Македонија е критикувана за корупција и нефункционалност на судскиот систем, сепак членовите на Судски совет немаат намера да си поднесат оставка. Тврдокорни се и остануват на ставот дека интерпелацијата против нив е незаконска и неуставна.
Тие не чувствуваат морална одговорност. Напротив, во телефонски разговор за Алфа, дел од нив рекоа дека интерпелацијата е надвор од паметот и спротивна на законите и Уставот. Инаку сите пет имиња се поврзуваат со СДСМ и ДУИ. Дури и последниот избор за претседател ан Врховниот суд е поврзан со име од Мала Речица.
Весна Дамева, од стручна во Кривичниот суд влезе во советот по предлог на поранешниот шеф на државата Стево Пендаровски, а претходно била дел и од правната комисија на СДСМ.
Селим Адеми, пред да влезе во Судскиот совет бил партиски функционер во ДУИ. Адвокатката Тања Чачаровска Илиевска, сегашна членка на Судскиот совет која се споменува како поранешен донатор на СДСМ. Миљазим бил советник во Министерството за правда во владата на СДСМ и ДУИ, а во советот е по предлог на Стево Пендаровски. Павлина Црвенковска, поранешната стручна соработничка од скопска Апелација, во Советот е по предлог и избор на пратениците на СДСМ.
