Најавата за мобилизација на членството на партиите од Европскиот фронт и суптилните закани завиени во реченицата „да му го покажеме местото на Мицкоски“ не ја плашат власта. Разобличен беше планот на ДУИ за дестабилизација на Македонија, па сега Агхмети и неговите блиски ја омекнуваат реториката, смета првиот човек на македонската Влада. Според Мицкоски секој има право на протест, но порача дека ако протестите преминат во насилство, надлежните жестоко ќе одговорат.
„Полека, но сигурно, се навикнува да биде во опозиција. Жалам што Али ги споредува својата партија и членовите со гума за спасување, очекував поголема креативност . Се надевам дека партијата ДУИ ќе се реформира и ќе има подобар пристап, наместо досегашните „крадење и пакости кои ѝ биле главен приоритет на партијата“.Европскиот фронт не успеа во првичните обиди за дестабилизација, па сега преминува на помека реторика, односно на граѓански протести. Секој има право на граѓански протест и дека тоа е убавината на демократијата. Ако протестите преминат во насилство, тогаш мораме да ги одбраниме институциите“ потенцираше Мицкоски.
Министерот Арбен Таравари, чија коалиција доби покана од опозицијата, да се приклучеле на фронтот за борба против како што рекоа, антиалбанската кампања на Мицкоски, само кратко рече дека ДУИ полека се адаптира на новосоздадените услови по изборите.
„Ахмети полека се навикнува да биде во опозиција, се надевам дека ќе се навикне уште подобро, само треба адаптација, ништо друго“, рече Таравари.
Европскиот фронт најави дека овој месец ќе оди на терен да ги собира симпатизерите за протести во ноември бидејќи Албанците со оваа власт биле понижени, ВМРО-ДПМНЕ ги нарекоа националсти, а ВРЕДИ слепи послушници на Мицкоски.
