Заедно да носиме одлуки за нашата татковина, нашата Македонија, секој конструктивен предлог на опозицијата ќе биде прифатен. Премиерот Христијан Мицкоски на денот на македонската револуционерна борба, повика на обединување на сите во државата. Според него, имал политички противници кои единствено гледале како да извадат некоја изјава од контекст, на начин со кој влегуваат во магичен круг на обвинувања, играјќи на картата на кратко помнење на македонските граѓани.
-Малку подалеку ги гледаме работите, бидејќи вие од каде што сега сакате да стигнете, ние од таму се вративме. Ајде да се обединиме и заеднички да носиме одлуки за иднината, бидејќи друга татковина немаме, освен оваа наша заедничка Македонија, која што ја сакаме најмногу на светот. Затоа јас ви велам дека секој ваш предлог, кој што е конструктивен и кој што е оваа насока ќе го прифатиме, изјави Мицкоски.
Мицкоски порача дека се надевал на мандат во кој ќе се работело на реформи, но сепак Македонија како и секогаш е заглавена во билатерални спорови, односно соседни држави кои сакаат да ја пишуваат нашата историја. Вели доколку не биле тие проблеми, државата одамна ќе била членка на Европската Унија. Ги повика граѓаните да не дозволуваат апатијата да ги проголта и да не ги водат алузии дека сите не пристигнале, а на нас не бивало.
-Суштината на нашата борба и нивната, на историското ВМРО е буквално иста. Историјата треба да зближува, а не да разединува, затоа сакам овој ден да го славиме сите и левата и десната страна од политичкиот спектар, затоа што ВМРО е и нивна историја. Во ВМРО и тогаш имало поделба на леви и десни. Ние мораме самите да се свртиме кон себе, да се цениме повеќе, да веруваме во себе, изјави Мицкоски.
Во Музејот на македонската борба за државност и самостојност се одржа свечена академија по повод денот на македонската револуционерна борба. Покрај премиерот, таму беше и претседателката Гордана Силјановска Давкова, министри од Владата, претставници на локалната самоуправа, пратеници од Собранието, а го немаше лидерот на опозициската СДСМ, Венко Филипче.
Матеја Петровски
