Најновите имиња на црната листа на САД, на поранешниот прв вицепремиер и актуелниот апелациски судија, само ги потврдуваат сомнежите за сторените сериозни криминали во претходната власт но и во судско-обвинителскиот систем.
Премиерот Христијан Мицкоски вели дека многупати предупредувале за ова – а сега истото го посочуваат стратешките парнери и меѓународната заедница. Тој очекува наскоро да се потврдат и други сомнежи за коруптивни зделки и криминално работење.
„На ажурираната листа на санкции на САД се најдоа двајца граѓани од кај нас. Ги имате таму причините зошто се тие дел од оваа листа на санкции. Можам да кажам дека во периодот што следува уште многу потврди на сето она што сме го имале како сомневање ќе излезе во јавноста и јавноста ќе биде запознаена“, рече тој.
Според наследникот на Груби, одлуката на американскиот Стејт Департмент за ставање е потврда за исправноста на заложбите на коалицијата. Првиот вицепремиер Изет Меџити го повика членството на ДУИ да го напушти како што вели, бродот кој тоне.
Во текот на вчерашниот ден бевме сведоци на уште една потврда за исправноста на нашите заложби, одлуки и политички постапки. Се докажа дека нашите укажувања и барања за борба против корупцијата биле исправни и точни. Одлуката на американскиот Стејт Департмент за ставање на Артан Груби на т.н. црна листа забранувајќи му влез во САД е доказ дека се’ што сме зборувале било на место и сме биле во право, порача Меџити.
Страшно и поразително е политичари со високи функции да бидат на црната листа, уште позагрижувачки е на црната листа да се појави име на судија, кога тие треба да бидат чувари на независноста на правосудството. Претседателката Гордана Сиљановска Давкова очекува обвинителство да постапи.
Не смееме како досега да останеме мирни и да ги оставиме лицата кои се нашле на црната листа да си продолжат со своите редовни активности. Ако јавните обвинители треба да постапуваат по допрен глас, треба да постапуваат и во овој случај. Во меѓународното право постојат начини како да се дојде до тие докази и да се започне постапка овде. Очекувам ЈО да почне да постапува – рече претседателката Сиљановска Давкова.
Груби и Беџети се најдоа на листата на санкционирани поради вмешаност во значителна корупција. На списокот се и членови на нивните потесни семејства.
