Поблаг речник, но јасни и недвосмслени пораки од САД и другите учесници на Минхенската безбедносна конференција. Вака премиерот Мицкоски ги оценува на политички план, трите дена кои ги помина во Минхен со македонската делегација. Заклучокот, според него е дека САД и Европската унија, како и државите на ЕУ-интегативниот пат се партнери, но мора да се знае каде лежи одговорноста и обврските.
„Тоа е суштината на пораките и од минатата година и од годинава, со таа разлика што минатата година беа подиректни, а годинава беа помеки. Заклучокот е дека Европа и САД се партнери, се пријатели, но мора да се знае кој какви одговорности има во тоа партнерство и тоа пријателство“ – додаде премиерот.
Мицкоски е особено задоволен од тоа што САД ја признава Македонија како најголем партнер во овој дел на Европа. Доказ за тоа било и постигнувањето да се издејствува Заедничка изјава за реципрочна трговија, која треба да прерасне и во Договор. Тој образложи дека Македонија уште првично добила исти услови како ЕУ со 15% тарифни стапки, а со претстојниот договор тие треба да се сведат на нула до 6,5% за 62 до 64 производи, кои се столбот на македонскиот извоз во САД. Меѓу нив, се преговара извозот на автобуси да подлежи на тарифи од нула до најмногу 2,5%. Мицкоски потенцираше дека Македонија во моментов има суфицит во трговската размена со САД.
Мицкоски во Минхен оставри средби со политички лидери, меѓу кои, претседателот на Европскиот Совет, Антонио Кошта и холандскиот премиер Дик Схоф. Според него, на сите разговори му било важно да ја образложи македонската позиција на евроинтегративниот пат, предизвииците со кои земјава се соочувала во минатото и сега и уверувањето дека членството во ЕУ за Македонија не е милост, туку нешто што со работа е веќе заслужено.
„Да укажеме на сите, би рекол, неправилности и неправда што ни е нанесена и како народ и како држава, но истовремено да потенцираме дека суштината е да не се сруши имиџот и кредибилитетот на самата Европска Унија, а имаме чувство и македонските граѓани чувствуваат фрустрација дека некој од самата Европска Унија однатре како да сака тој имиџ и тој кредибилитет да го уништи. Владата ќе ја раскажува македонската приказна која е тажна и полна со предизвици. Но, секогаш да знаете дека Македонија победува“ – вели Мицкоски.
Македонската делегација во Минхен оставри клучни средби и со челниците на веќе присутните компании во Македонија Шварц груп кој го отвара ланецот Лидл и телекомуникациската компанија „4 Ај Ги“. Со двете компании кои работат и во други сфери било разговарано за проширување на инвестициите во Македонија. Инаку, Мицкоски вчера на маргините на конференцијата се сретна и со украинскиот претседател Володимир Зеленски. Двајцата лидери разговарале за актуелните безбедносни предизвици во Европа, за потребата од единство и солидарност и за праведен мир. Тема на интерес било и продлабочувањето на економската соработка, размена и поддршка во процесите за напредок на двете земји.
