Македонскиот јазик е многувековен, никому не оспоруваме, не сакаме ниту нас да ни оспоруваат. Порача премиерот Христијан Мицкоски од Брисел, каде беше дел од самитот ЕУ- Западен Балкан, како и самитот и на Европската народна партија. Во интервју за македонската радио телевизија, Мицкоски вели дека никој не смее да си игра со емоциите на Македонците.
-Кога имаме емоција, нема рацио и кога имаме емоција имаме лоши чувства. Никому не оспоруваме ништо, така не сакаме ниту нас да ни оспоруваат. Тоа е мојата порака и вчера и денеска. Мојот многувековен идентитет е мој многувековен идентитет, мојот мајчин македонски јазик е мој мајчин македонски јазик, кој што има многувековни корени, изјави Мицкоски.
Во моменти кога билатералниот проблем со Бугарија ни е пречка на европскиот пат, Мицкоски вели дека треба да има разговори меѓу двете држави, но тие да бидат за економски раст на регионот, а не да се чепка во македонските национални интереси.
-Билатералната соработка е клучна кога зборуваме за економска соработка, кога зборуваме за туризам кога зборуваме за размена на „know how“ вештини, образонието итн итн. И тука тој процес има додена вредност, но доколку билатералните разговори и преговори се однесуваат на идентитетските прашања, тогаш тој процес никако не може да заврши успешно, изјави Мицкоски.
Според него решение мора да има и ќе има, Македонија ќе го изоди патот кон Европската Унија, но со гаранции дека уцени веќе нема да има.
-Ние сега сме во втората фаза, бараме решение, но не решение кое што ќе не доведе да ја прескокнеме првата пречка, туку да го изодиме патот до крај и тоа е пораката на нашите соговорници. И веќе на секој му е јасно дека мора да бараме решение и ќе најдеме решение, а ние како Влада сме подготвени да работиме онолку колку што е потребно да дојдеме до тоа решение, изјави Мицкоски.
Официјален Брисел е свесен за билатералниот проблем на Македонија, но порачуваат дека главна цел на Европската Унија е проширувањето со земјите од Западен Балкан, кое треба да биде по мерит системот, односно според постигнувањата на аспирантите за членство.
Матеја Петровски
