Економски и енергетски напредок, владеење на правото и продлабочување на соработката меѓу Македонија и САД. Тоа се темите на кои владината делегација, предводена од премиерот Христијан Мицкоски, разговарала на средбата со Ричард Гренел, поранешен прв човек на американското разузнавање и добар познавач на состојбите во регионов.
-Плодна и пријателска вечера со Ричард Гренел, американски дипломат, поранешен директор на американската разузнавачка служба и добар познавач на состојбите на Балканот. Економија, енергетика и владеење на право, теми за продлабочување на соработката, напиша Мицкоски на Фејсбук.
Посетата на Вашингтон Мицкоски, Мисајловски, Муцунски и Тошковски, ја искористија и за средба со Македонците кои живеат во САД.
-Пред почетокот на самитот на НАТО, посветив внимание за позициите и прашањата на нашата дијаспора. Имав одлична средба со Мето Коловски и Обединетата македонска дијаспора со кои разговаравме за поддршка и лобирање за македонските интереси, напиша Мицкоски на Фејсбук.
За време на НАТО самитот, премиерот ќе присуствува и на вечерата во Белата куќа, организирана за лидерите заедно со сопружниците, а министерот за надворешни работи и надворешна трговија Муцунски и министерот за одбрана Мисајловски ќе присуствуваат на специјални вечери организирани од државниот секретар Етони Блинкен и секретарот за одбрана Лојд Остин.
Посетата на Мицкоски, од Владата велат има за цел да ги зајакне билатералните односи со САД, да ја афирмира Македонија како стабилен партнер и да ги промовира економските можности на нашата земја пред американските инвеститори.
Македонската делегација на Самитот на НАТО за одбележување на 75 годишнината од формирањето на Алијансата, во Вашингтон ја предводи Мицкоски заедно со министрите за одбрана Владо Мисајловски, за надворешни работи и трговија Тимчо Муцунски како и за внатрешни работи Панче Тошковски.
Ова е прво патување на Мицкоски надвор од Македонија, откако застана на чело на Владата. Не е исклучено на Самитот да се случи и средба со грчкиот премиер Мицотакис, прва по рекациите околку користењето на уставното име. Засега нема официјална потврда дали ќе се сретнат, но доколку дојде до тоа Мицкоски рече дека очекува достоинствено однесување во Вашингтон, за разлика од Мицотакис кој најави дека македонскиот премие ќе се најде во многу непријатна позиција на Самитот. Во меѓувреме , Пентагон испрати порака до Македонија и Грција, да го остават спорот околу името и Преспанскиот договор надвор од Алијансата.
Матеја Петровски
