Претседателот на Владата Христијан Мицкоски попладнево ќе присуствува на бизнис-средба помеѓу швајцарските и македонските стопанственици во винарницата „Камник“ заедно со претседателот на Швајцарската Конфедерација, Ги Пармелан, кој е во официјална посета на земјата.
Како што најавија од владината прес-служба, Мицкоски и Пармелан пред почетокот на средбата ќе дадат кратка изјава за медиумите.
Претседателот на Швајцарската Конфедерација, Ги Пармелан, претпладнево пристигна во Скопје, а на аеродромот беше пречекан од министерот за надворешни работи и надворешна трговија, Тимчо Муцунски.
– Добредојде за претседателот на Швајцарската Конфедерација, Ги Пармелан, во Скопје. Утрово, со највисоки воени и државни почести, го пречекав претседателот Пармелан, кој заедно со сопругата престојува во официјална посета на земјата на покана на претседателката Гордана Сиљановска-Давкова – напиша министерот Муцунски на „Фејсбук“.
Посетата, како што посочува Муцунски, претставува потврда за одличните билатерални односи и можност за нивно натамошно продлабочување, со посебен акцент на политичката и економската соработка.
Претседателката Гордана Сиљановска-Давкова го пречека претседателот на Швајцарската Конфедерација, Пармелан, со највисоки државни и воени почести на церемонија во Кабинетот на претседателката.
По пречекот, како што информирата од Кабинетот на претседателката, следува тет-а-тет средба на претседателите, а потоа и пленарен состанок на македонската и швајцарската делегација.
По пленарниот состанок, Сиљановска-Давкова и Пармелан ќе одржат заедничка прес-конференција.
Парламелан ќе има средба и со претседателот на Собранието, Африм Гаши.
Во рамките на посетата швајцарскиот претседателот ќе положи венец на гробот на Гоце Делчев во црквата „Св. Спас“ во Скопје.
