Доволно беше чекање, од понеделник започнува акција против одредени обвинители кои што директно штитат политички и бизнис моќници, за кои постојат сомнежи дека долги години вршеле криминал во Македонија, порача премиерот Христијан Мицкоски. Вели на дел од луѓето во правосудството им била дадена шанса да почнат да ја работат својата работа, но сепак нема никакви резултати, туку гледаме само заштита на можни криминали сторени од моќници.
-Доволно беше чекање, чекавме дадовме шанса, доволно беше, очигледно дека прежестоки се нападите наеднаш на дијареа, грчеви во цревата, главоболка, температура, анкциозност итн кога ќе треба да се потпише последниот указ за да се спроведе правдата кај поедини обвинители за жал, изјави Мицкоски.
Справување со можните инкриминирани кадри во правосудството се најавува веќе неколку месеци. Мицкоски порача дека планот како ќе се справуваат со овој проблем веќе е направен и вети дека нема да шоу и спектакуларни апсења со цел некој да биде понижен, како што тоа беше во минатото.
-Не функционираме како естрада и сигурно нема јас да кажувам тоа како што во минатото се случуваше, пред камери, пред медиуми или да носам специјални полициски единици, да понижувам луѓе и индивидуи итн итн. Имаме план, од понеделник почнуваме со имплементација на планот, изјави Мицкоски.
Мицкоски на пратеничките прашања од собраниската говорница рече дека има неколку стотици случаи од Министерството за внатрешни работи и Финансиската полиција кои се наоѓаат во Обвинителството за постапување и дека по нив не се постапува. Кажа и дека таму има луѓе кои не ги интересира правдата, туку дека тие се нечии заробеници.
Матеја Петровски