Претседателот на Владата и претседател на ВМРО-ДПМНЕ Христијан Мицкоски вечерва изјави дека доколку опозицијата побара предвремени парламентарни избори, тие во секое време се подготвени да излезат на избори и да победат. Мицкоски рече дека неговиот став е познат и дека неговата Влада доби мандат од четири години.
– Мојот став е познат во јавноста и ставот на оваа Влада дека ние добивме мандат за четири години. Мандатот завршува пролетта 2028 година. Се уште имаме техничка Влада. Значи крајот на оваа политичка Влада би требало да биде некаде крајот на 2027 година така што тоа се оние параметри коишто можам јас сега да ги кажам и врз основа на кои добивме доверба од граѓаните – рече Мицкоски во интервју за една од националните телевизии.
На прашањето што може да го предомисли, тој рече дека логично е опозицијата да сака да биде Влада затоа што мисли дека може да биде подобра од Владата и ако опозицијата побара предвремени парламентарни избори тогаш како Влада тие се подготвени за лидерска средба, да се договори термин и да се оди на предвремени парламентарени избори.
– Нема да бегаме, се разбира. Затоа јас велам, мандатот наш е за четири години и за толкав период сме добиле поддршка од граѓаните да испорачаме реформи, но доколку имаме фрлена ракавица од страна на опозицијата, нормално е нема ние кукавички да бегаме од избори. Напротив ние сме подготвени во секое време да излеземе и да ги победиме – изјави премиерот Мицкоски.
