Трезорот ќе остане отворен. Министерството за финансии остро ги демантира шпекулациите и обвинувањата дека исплатите од државната каса ќе запреле денеска зашто во буџетот наводно немало пари. Гордана Димитриеска – Кочоска е зачудена како опозицијата може да спинува за вакви сериозни теми, вели дека не и е јасно зошто СДСМ се обидува да внесе страв кај јавноста, а додава и дека е најдобро институциите да ги достават налозите што поскоро за да може навреме да се прегледаат и да се исплатат пред да заврши буџетската година.
„Многу несериозно е да се каже Трезорот затвора. Трезорот ги прибира налозите со цел подобро да се организира до крајот на годината. Како ќе затвориме, клуч ќе ставиме на Министерството и ќе одиме на зимување. Не е така, Трезорот ќе си работи до 31-ви и тоа е вообичаено. Трезорот е единствениот сектор во Министерството којшто останува до седум – осум часот, имало и години до 11 часот навечер кога Трезорот работел“, рече Димитриеска-Кочоска.
Димитриеска Кочоска вели дека фактите јасно говорат дека пензиите, платите, надоместоците се исплаќаат редовно, дека се што доаѓа за исплата, легнува на сметките на корисниците. Се се сервисира на време и простор за паника нема – уверува Димитриеска Кочоска.
„Доколку има задоцнување, тогаш тоа е во ресорните институции при подготовка на налозите. Од она што го имав добиено како податок од Министерството за социјална политика беше дека имаат нови потпишани решенија кои чекаат да се стават во систем и да почне исплатата наеднаш. Тогаш да проверите во рамки на самите министерства решенија што не се потпишувале од септември бидејќи сме биле во избори така што не станува збор за тоа дека Трезорот не исплатил. Во петокот имавме исплата на три милијарди од кои две милијарди и 400 се само блок дотации за образование каде е вклучена и исплатата на К-15“ – рече Димитриеска-Кочоска.
Претходно и премиерот ги негираше обвинувањата на опозицијата дека владаат за првпат наводно ќе стави клуч на трезорот на 15 декември. Мицкоски потврди и дека ќе се испалти К-15 за вработените во државните институции во текот на месецов.
