Агенцијата за супервизија на капиталното финансирано пензиско осигурување – МАПАС апелира граѓаните навремено да ги ажурираат своите податоци со цел да може навремено да добијат информации од пензиските друштва за состојбата со нивните сметки. Граѓаните треба да ги проверат и ажурираат своите лични податоци, да пријават евентуална промена на адреса или контакт информации.
– Со цел поголема транспарентност и континуиран увид во пензиските заштеди, пензиските друштва во Северна Македонија еднаш годишно доставуваат извештаи до своите членови, кои се сè уште вработени, како и до пензионираните членови. Овие извештаи содржат детаљни информации за состојбата на индивидуалната пензиска сметка, доброволната индивидуална сметка, професионалната сметка и инвестициското портфолио. Извештаите се доставуваат во зелен плик и ги опфаќаат податоците за претходната календарска година. Во согласност со регулативата, доставата се врши најдоцна до 31 март во тековната година – појаснуваат од МАПАС.
Додаваат дека е важно граѓаните да ги ажурираат податоците за да го добијат нивниот зелен плик навремено и на точна адреса и оти затоа од особена важност е да се ги проверат и ажурирате своите лични податоци, да пријават евентуална промена на адреса или контакт-информации. Ова, велат, е особено значајно за членовите на вториот и третиот пензиски столб.
Според Агенцијата, редовното следење на пензиските заштеди ви овозможува подобро планирање на вашата финансиска иднина, како и поголема сигурност и контрола врз вашите средства.
