Македонија и Бугарија се договорија да продолжат со изградбата на прекуграничниот железнички тунел меѓу Деве Баир и Ѓуешево, врз основа на постоечкиот технички проект подготвен од македонска страна. До крајот на јули ќе се финализира текстот на меѓувладиниот договор, со кој ќе се утврдат техничките, финансиските и градежните обврски на двете земји.
На состанок во Брисел, во организација на Европската комисија, претставници на двете држави се согласија и за повторно објавување на тендерот за делницата Крива Паланка – влез на тунелот, до крајот на 2025 година. Исто така, договорено е изградбата да почне на почетокот на 2026 година.
Работни групи ќе го координираат процесот, а ќе се истражуваат и можности за заедничко финансирање преку ЕУ и меѓународни институции. Европската инвестициска банка изрази подготвеност да помогне во техничките дискусии и целиот процес.
