Глобалната економија, економскиот раст, финансиската стабилност, инвестициите и вештачката интелигенција се главните теми кои ќе бидат во фокусот на разговорите на бројните светски бизнис и политички лидери на Економскиот форум во Давос.
Меѓу учесниците, рамо до рамо со светската елита, е и претседателот на македонската Влада, Христијан Мицкоски, чија агенда во Давос е многу амбициозна. Премиерот ќе има бројни разговори, билатерални средби и дебати, на кои ќе ја презентира економската и инвестициската понуда на земјата. Тој нагласува дека акцентот е ставен на економскиот раст, привлекувањето инвестиции, технологијата и можностите за инвестирање во Македонија.
„Следните денови ќе имаме бројни состаноци, за кои очекуваме значително да влијаат на подобрувањето на економската состојба и привлекувањето голем број инвестиции. Учесник ќе бидам на три панели, на кои ќе ги презентирам можностите за инвестирање во Македонија. Истовремено, ќе оствариме и бројни билатерални средби со многу компании од светот. Очекувам плодни резултати, успешни состаноци и успешна посета во Давос“, изјави Мицкоски.
На Самитот е најавено учество на околу 400 високи функционери и политички лидери, меѓу кои 65 шефови на држави и влади, 55 министри за економија и финансии, 33 министри за надворешни работи, 34 министри за трговија и индустрија и 11 гувернери на централни банки. Со добар дел од нив, Мицкоски и делегацијата која тој ја предводи ќе оствари директни средби, на кои ќе се разговара за реформските процеси и обезбедувањето поддршка за клучните национални проекти.
Колкаво е значењето на Давос годинава зборува и присуството на низа значајни политички лидери. Клучните пораки се очекува да ги упати американскиот претседател Доналд Трамп, кој утре ќе има говор пред присутните. Таму ќе бидат и францускиот претседател Емануел Макрон, германскиот канцелар Фридрих Мерц, шпанскиот премиер Педро Санчез и аргентинскиот претседател Хавиер Милеј. Кинеската делегација ја предводи заменик-премиерот Хе Лифенг.
Главното мото, односно тема на собирот во елитното швајцарско одморалиште годинава, е „Во духот на дијалогот“.
