Eксплозии се слушнаа во Дубаи и Доха, по ескалацијата на конфликтот меѓу САД, Израел и Иран. Обединетите Арапски Емирати соопштија дека пресретнале ракети. Снимките објавени на социјалните мрежи прикажуваат ракети како летаат над Дубаи, вклучувајќи една над Бурџ Калифа, највисоката зграда во светот.
Обединетите Арапски Емирати соопштија дека пресретнале повеќе ирански ракети, без да наведат дополнителни детали за евентуални штети.
Македонецот Миле Трифуновски наш поранешен колега, кој работеше во тимот на Алфа како монтажер, а сега живее и работи во Катар, раскажува каква е ситуацијата таму.
-Ситуацијата не е наивна летаат проектили цело време над нашите глави, ама да речеме дека до некаде е под контрола. Сега засега во Катар нема паднато ниту еден проектил директно врз американска база, системот за воздушна одбрана најверојатно функционира и повеќето проектили се пресретнати од она што можеме да видиме. Се слушаат пукотници, сега засега мислам дека ситуацијата е под контрола колку што може да се каже под контрола, со оглед на тоа дека е воена состојба, вели Трифуновски.
Вели и дека има препораки од властите.
-Препораките генералнос е за ненапуштање на домовите, оние кои што немаат потреба да се движат по градот, препорачливо е да си останат во своите домови, подалеку од прозорците. И од она што можев да зебележам бидејќи доаѓав накај работното место, улиците се полупразни, невообичаено е тивок сообраќајот во Доха, вели Трифуновски.
