Зголемен број пациенти со гастроентероколити и други цревни инфекции во изминатите два месеца регистрираат лекарите од Инфективното одделение при Општата болница Куманово.
Раководителката на Одделението, д-р Валентина Џартовска, вели дека бројот на пациенти е зголемен особено во летниот период, кога високите температури, патувањата и собирањата во поголеми групи придонесуваат за ширење на инфекциите. На дневно ниво, во одделението се прегледуваат повеќе од 100 пациенти.
-Сега некако повеќе се зголемува бројот на пациенти, особено во екот на летната сезона, со зголемувањето на температурите. Климатските промени секако имаат влијание, а тука се и патувањата на луѓето и собирањето во поголеми групи. Зголемен е бројот на нашите пациенти, со предоминација на гастроентероколити или цревни инфекции. Застапени се сите возрасни групи. На дневно ниво имаме повеќе од 100 пациенти- изјави д-р Џартовска.
Поголемиот дел од инфекциите поминуваат со полесна клиничка слика и пациентите немаат потреба од хоспитализација. Најчести симптоми се повраќање, дијареа и мачнина, а може да се појават и зголемена температура, болки во стомакот, болки во мускулите, главоболка и дехидратација. Докторката појаснува дека тежината на симптомите и ризикот од дехидратација зависат и од возраста на пациентот.
-Јачината на симптомите кај цревните инфекции зависи и од возраста. Дехидратацијата може да биде поизразена кај малите деца и кај повозрасните, но кај нив состојбата може да биде дополнително комплицирана и поради хроничните заболувања што ги имаат. Затоа манифестациите може да бидат и од страна на други органи, а не само како последица на дехидратацијата- изјави д-р Џартовска.
Како најважна мерка во почетната фаза на инфекцијата ја издвојува рехидратацијата, односно внесот на доволно течности. Таа препорачува во летниот период да се внесува полесна храна и да се посвети особено внимание на начинот на чување и подготовка на намирниците. Храната што треба термички да се обработи треба да биде добро обработена, а намирниците, овошјето и зеленчукот добро измиени пред употреба.
-Цревните инфекции најчесто се пренесуваат фекално-орално, а одредени вируси, како норовирусите, може да се пренесуваат и по капков пат. Затоа личната хигиена е многу важна. Треба добро да се мијат намирниците, садовите и просторот во кој се подготвува храната. Треба да се избегнуваат блиски контакти со болни лица и да се одржува хигиена по контакт со лице кое има цревна инфекција- изјави д-р Џартовска.
Во однос на пробиотиците, Џартовска вели дека тие може да помогнат во одржувањето на нормалната цревна флора. Таа апелира граѓаните да не ја потценуваат дехидратацијата, особено кај малите деца и повозрасните, и навреме да побараат медицинска помош доколку симптомите се поизразени или состојбата се влошува.
