Иако медиумите и надлежните изминатиот период најавуваа финиш на истрагата за бегалецот Љупчо Палевски Палчо, незивесно е до која фаза е истрагата и кога може да се очекува обвинение. Кривичен суд веќе го оцени обвинението за неговите соучесници и го распореди кај надлежен судија. Палчо минатиот месец даваше исказ пред обвинител и негираше вина, но со оглед на одговорите од обвинителството, тешко дека летово тој ќе влезе во судница. Од обвинителството со кус одговор за фазите и текот на истрагата: се уште се преземале дејствија.
„Во предметот се преземаат истражни дејствија за кои во моментов не сме во можност да споделиме детали“, велат од Обвинителство на Македонија.
Во меѓувреме, за останатите обвинети соучесници на Палчо, Влатко Кешишов, Велибор Манев и Боре Видевски, кои се обвинети за две грабнувања и две убиства на свиреп начин, како и таткото на Вања, Александар Ѓорчевски кој е обвинет за помагање при грабнување, советот на судии од Кривичниот суд, веќе го оцени обвинението, а оформениот предмет ќе го распоредат кај надлежен судија.
„По разгледување и ценење на актот како и доставените приговори изјавени против обвинението од страна на одбраната на обвинетите, донесе решение со кое – Приговорите на одбраната се одбиваат како неосновани, а Обвинителниот акт се одобрува во целост“, велат од Кривичен суд.
Иако Обвинителството водеше две истраги, од која едната финишираше со обвинение за сопартијците на Палевски и таткото на малата Вања, а друга за екстрадираниот Палевски Палчо, сепак очекувано е да им се суди на сите заедно во еден предмет.
Љупчо Палевски Палчо на 5 ти јуни негираше вина во Обвинителство, а според неофицијални извори, тој имал и алиби за периодот кога се случи убиството.
Од она што до сега е официјално познато од изстражните органи, Палевски на 27 ноември лани им давал насоки на Кешишов, Манев и Видевски, со автомобилот на претходно убиениот Панче Жежовски да ја грабнат Вања од зградата. Сознанијата за нејзиното излегување ги имале од нејзиниот татко. Откако ја киднапирале и ставиле во автомобил, по пат им се приклучил и Палевски и заедно се упатиле кон Бразда каде е извршено убиството на 14-годишното девојче. Палевски потоа беше во бегство во Турција, а тројцата соизвршители кои на 6 декември беа уапсени признаа вина. Палчо помина неколку месеци во притвор во Баликесир, по што беше депортиран во скопскиот затвор Шутка.
Паула Костадиноска
