Ако случајно се прифати нелогичното барање на ДУИ за Бадентер во Уставниот суд, тоа целосно ќе ја сруши оваа институција. Според првиот уставен судија, Дарко Костадиновски, ако се прифати она што го бара партијата на Али Ахмети, слободно може да се стави клуч на судот кој ја штити уставноста, законитоста и ја гарантира примената на Уставот како највисок правен акт во државата.
Костадиновски смета дека Бандетерот може да е корисен за Собранието, каде што се носат законите, но е недозволив како во Уставен, така во Судскиот совет, бидејќи со таков институт, нема да преовладува правото, туку друг тип на расудување, кој може само да го сруши правниот систем.
-Доколку се примени бадентер, тоа ќе значи дека не правни, туку друг тип на расудувања ќе одлучуваат за уставноста и законитоста и за слободите и правата на човекот и граѓаните. Такво нешто не постои никаде во светот. Ако такво нешто се случи, подобро е на оваа институција да се стави клуч и нема потреба од постоење на оваа институција, ако такво нешто се предвиди тука, изјави Костадиновски.
Според најавите наскоро Уставниот суд би требало да се комплетира. Во текот на утрешниот ден се очекува на дневен ред во Собранието да биде можниот избор на универзитетскиот професор од Правниот факултет Јустинијан први, Гоце Наумовски, за нов уставен судија. Костадиновски вели дека веднаш штом се комплетира целиот состав на судии, ќе продолжи да се работи по сите предмети, меѓу кои и еден од главните, законот за употреба на јазиците.
-Го знаете мојот став нема сензитивни, помалку сензитивни и повеќе сензитивни предмети. Сензитивноста не исчезнува со протокот на времето. Било кој предмет ако е сензитивен денес, ќе биде сензитивен и во 2035-та година, ќе биде сензитивен и во 2050-та. Наша работа е да ја вратиме довербата на граѓаните во владеењето на правото и во правната држава, и за мене не постојат сензитивни, помалку сензитивни, ќе се постапува по сите предмети, изјави Костадиновски.
Уставниот суд и Академијата за судии и јавни обвинители Павел Шатев склучија Меморандум за соработка, кој треба да помогне во идното делување на стручните служби во Уставен. Задоволство од најновата соработка изразија и Костадиновски и директорката на Академијата, Ирена Трајкоска Стрезоски.
Матеја Петровски