Под мотото „Прво човек, потоа градоначалник“, ВМРО-ДПМНЕ и коалицијата „Твоја Македонија“ го претставија својот кандидат за градоначалник на Скопје – Орце Ѓорѓиевски. Настанот се одржа пред бројни граѓани, во атмосфера на надеж за нов почеток и поинаков пристап кон водењето на главниот град.
Ѓорѓиевски истакна дека функцијата не смее да биде само титула, туку пред се обврска кон граѓаните, кон секој еден скопјанец.
„Ова не е глас само за мене. Ова е глас за надежта, работата, решителноста. За иднината во која нашите деца ќе растат онака како што ние немавме шанса,“ рече Ѓорѓиевски.
Тој најави конкретни чекори уште во првите 72 часа – генералка на Скопје како и целосна акција во идниот период против дивите депонии. Во програмата се планирани нови паркови и зелени површини, пошумување, еко-бригади, како и уредување на кејот на Вардар по модел на европските метрополи.
На настанот зборуваше и претседателот на ВМРО-ДПМНЕ, Христијан Мицкоски, порача дека градот мора да ја надмине сегашната состојба и дека потребна е отчетност на сите нивоа.
Скопје денес е загубен во дневната политика, а жртва се граѓаните. Лоцирање одговорност мора да има за упропастениот град и оставениот хаос. Многу работа, посветеност и вистински луѓе на вистински места, тоа му е неопходно на Скопје, а Орце е вистинскиот избор, рече денеска премиерот и претседател на ВМРО-ДПМНЕ Христијан Мицкоски.
Со ова, Мицкоски испрати порака дека граѓаните ќе имаат јасна гаранција за транспарентност и отчетност на идните локални власти.
Носител на советничката листа која брои 45 кандидати за советници е професорот Даме Димитровски, кој порача дека изборите се момент за обединување и заедничка одлука за иднината.
Ова е битка за нашите семејства и деца. Сите заедно можеме да изградиме Скопје каде што ќе бидеме горди што живееме, изјави Даме Димитровски – кандидат за советник на град Скопје
Тој потсети дека листата за советници ја сочинуваат луѓе со кредибилитет и професионален интегритет, подготвени да работат транспарентно и во интерес на граѓаните.
На промотивниот настан пораките беа дека визијата на коалицијата е Скопје да стане зелен, безбеден и европски град – со ред во урбанизмот, современ јавен превоз, уреден кеј на Вардар и културни институции што ќе го вратат градскиот дух.
