Депонијата Вардариште заминува во историјата. Местото кое што со децении ги труеше скопјани, полека, но сигурно почна да се средува. Багери го претрупуваа земјиштето и рамена теренот, а опасниот отпад и ѓубре беше изнесен со камиони. Надлежните започнаа со површинско чистење, а потоа ќе следи и процесот на одгаснување. Операциата која трае веќе неколку дена се спроведува согласно изработена физибилити студија и предвидена динамика.
„Станува збор за сложен и сериозен зафат, кој за првпат се спроведува во државата по нејзината независност, и претставува значаен чекор во решавањето на еден децениски еколошки проблем. По оваа фаза, ќе следува процес на одгасување на депонијата, кој ќе го реализира специјализирана компанија со соодветна експертиза“, велат од Град Скопје.
Местото кое со децении беше извор на потенцијални зарази, ќе прерасне во еден од најголемите паркови во Скопје, кој ќе се простира на површина од 300.000 метри квадратни и ќе биде изграден по сите европски и светски стандарди. За градоначалникот градот Скопје конечно ќе добие нови бели дробови и ќе го подобри квалитетот на живот на граѓаните, мешто што беше негово ветување.
„На местото на повеќедецениската депонија на „Вардариште“ ќе изградиме нов современ парк по сите стандарди“, изјави Орце Ѓорѓиевски, градоначалник на град Скопје во предизборието.
Од град Скопје засега не одговорија што ќе биде со луѓето кои живееја на ова место во импровизираните куќарки, дали и тие ќе се рушат.
Со години, Вардариште беше место на кое избувнуваа пожари што предизвикуваа густ чад, мирис и дополнително загадување на воздухот во околните скопски населби. Дел од најголемите проблеми беа пожари што редовно избувнуваа поради палење кабли и отпад, каде што индивидуи гореа материјали за да извлечат метали како бакар, што дополнително ја влоши еколошката состојба на областа.
Жителите на населбите како Аеродроми Ново Лисиче често реагираа на дневниот чад и загадување, организирајќи протести со барања за итно решавање на проблемот вклучувајќи поставување термални камери, 24-часовен надзор и ограда за спречување на пристап на лица што палат отпад.
