Битка за чист чаршав во клиничкиот центар „Мајка Тереза“.Трет ден во пералната не работат машините за прење и сушење. Истовремено работниците штрајкуваат поради доцнење на плати. Проблемот со неисплаќањето на платите трае со месеци. Од Заединички служби прстот го вперуваат во фирмата Скопстер која управува со пералната, директорот Башким Бакиу со документи образложи дека трошоците за услугите на компанијата биле целосно подмирени и дека пари за плати на вработените имало, а зошто не им се исплатени останува нејасно.
Надлежните проблемот ќе го решаваат со одземање на ингеренциите на фирмата Скопстер. На владина седница ќе биде разгледан предлогот со пералната да раководи Владата, односно Службата за општи и заеднички работи.
Вонреден надзор во пералницата имало и од Државниот санитарен и здравствен инспекторат, констатирано е дека не ги исполнува условите за вршење на дејноста.
Купишта чаршави стојат со денови во пералната, од каде се шири непријатна миризба…пациентите при операција или хоспитализација во моментов лежат во постелнини кои се перат во некоја машина во рамки на самите клиники, бидејќи сопствена перална има само на Клиниката за онкологија и на Клиниката за инфективни болести.
Пералницата на најголемиот Клиничкиот центар во Македонија е во руинирана состојба. Таа ги опслужува интерните клиники, хируршките клиники, операциите, буквално целиот здравствен центар.
