Инсталација на фотоволтаици во Белица и Струмица, реализирани проекти за поурбан и поодржлив транспорт во општините низ Македонија, примена на поодржливо земјоделие во неколку региони низ земјава. Сето ова, во функција во борбата против климатските промени и загадувањето, како глобален светски проблем кој не ја заобиколува и Македонија.
Проекти за искористување на обновливите извори на енергија и подобрување на состојбата со енергетската сиромаштија, се спроведени и во скопските општини Центар и Аеродром.
Овие примери покажуваат дека проблемите со загадувањето се големи, но, не се нерешливи.
Од граѓанската организација „Еко свест“, велат, дека спровеле многу проекти за намалување на проблемот со климатските промени и токсичниот воздух, со финансиска поддршка од Шведската влада.
Од невладината се оптимисти дека и македонските општини, почнуваат сериозно да го сфаќаат проблемот и почнуваат во локалните буџети да планираат сретства за оваа намена.
„Имаме примери на општини во Центар, Прилеп и Гевгелија каде локалните планови за енергија и клима се усвојуваат во општините, акциите и мерките се ставаат во буџетите и се надеваме дека оваа година и во наредниот период ќе гледаме конкретни акции од општините“, изјави Жарко Конески од „Еко Свест“.
Оттаму велат дека имаат капацитет да ја мобилизираат заедницата и граѓаните и заедно да понудат одржливи решенија. Потребно е само, вклучување на сите чинители во општеството, во носењето одлуки, со чие спроведување, ќе се придонесе за искоренување на штетните навики.
Љубиша Владимиров
