Фондот за здравство ги “спаси” јавните здравствени установи кои тонеа во милионски долгови. Вкупниот долг од 5 милијарди денари во болниците, клиниките и здравствените домови во Македонија со ребалансот на буџетот отплатени се две милијарди денари .Со ова долгот на јавното здравство останува на 3 милијарди, што според директорот на ФЗОМ, Сашо Клековски е на подносливо ниво.
Тој најави дека ќе има одговорност за секој кој ќе се докаже дека направил злоупотреба на службената положба.
Според премиерот, ова е голем успех за јавното здравство што полека но сигурно се решава должничката криза во овој сектор.Мицкоски вели дека со домаќинско, вредно и посветено работење на новиот менаџмент во болниците и во здравствените установи низ државата долговите ќе бидат вратени.
“Да го потврдам и да честитам на Фондот, на менаџментот на Фондот, на Министерството за здравство што за вака кратко време успеаја да се консолидираат и да ги земат работите, што се вели народски, во свои раце и да вратат околу две милијарди денари, што е нешто коешто досега не се случило, ако се има предвид дека, како што кажа самиот директор, во првата половина од годината, тој долг е зголемен за цела една милијарда. Па сега вие можете да замислите со какви цели биле тие пари и каде биле употребувани. Така што еве посакувам уште многу убави вести, па до година да зборуваме за долг нула, на тој начин ќе обезбедиме и тековно сервисирање на обврските” – вели премиерот Мицкоски.
Најголеми злоупотреби во јавните здравствени установи се правеле со не плаќање редовно сметки кон добавувачи за лекови, а од друга страна, медицински и економски директори си ги зголемувале платите со додадени дежурства. Најголеми должници се Клиниките за Онкологија, Торакална и Гинекологија.
Болниците и клиниките успеале од почетокот на годината до јуни, долгот од 65 милиони да го зголемат на 81 милиони евра.
