Владата предводена од премиерот Христијан Мицкоски денеска ја задолжи Службата за заеднички и општи работи, да ја врати оградата околу владината зграда. Оградата пред седум години ја отстрани Владата тогаш предводена од СДСМ и Зоран Заев. Тогаш беше најавено дека тоа се прави со цел просторот пред Владата да биде отворен за граѓаните, но сепак беше поставена еден ограда, односно бариери кои ги има МВР, а се користат најчесто при протести.
Кога ќе биде вратена оградата не се знае се уште, бидејќи новиот директор на СОЗР, Ивица Томовски на социјалните мрежи напиша дека поради негрижата на претходната власт таа е оставена во катастрофална состојба.
Денес Владата ја задолжи Службата за заеднички и општи работи да ја врати оградата која беше поставена околу владината зграда, но насилно извадена од страна на претходната власт и заменета со дотраени полициски огради наменети за разбивање на граѓански собири. Оградата е лоцирана и истата е во незавидна состојба, што може да се види и од фотографиите. Она што е посебно фрапантно е акутната негрижа кон државниот имот. СОЗР ќе направи напори со сопствени сили да ја стави оградата на нејзиното вистинско место во најкус период, напиша на Фејсбук новиот директор на СОЗР, Ивица Томовски.
