Ќе се менува концептот на државна матура. Новитетот ќе биде полагањето на стручна матура. Ова би значело дека средношколците своето високо образование ќе може да го продолжат само на факултетите, во делот за кој им бил матурскиот испит. Тоа се предвидува со измените во Законот за средно образование. Министерката Весна Јаневска вели дека ова е и повеќе од логично, бидејќи учениците во стручните училишта многу поголем дел од образованието учат стручни предмети, за разлика од оние во гимназиите.
-Државната матура ќе се менува, училишна матура, пазар на труд, стручна државна матура, продолжување на високообразовен процес во високообразовни установи, но во соодветното поле, подрачје, област. Што значи машинско на машински факултет, електро на електро факултет, а ако сакаат на друг, на економскиот факултет, ќе мораат државна матура да полагаат, изјави Јаневска.
Измените предвидуваат и поголема инклузивност и достапност на сите до средното образование, кое според закон секако е задолжително. Јаневска порача дека конечно се прават детални промени во овој закон, бидејќи досега со години се носеле само козметички измени.
-Ќе има бесплатно учење на оние деца кои се наоѓаат во поправно и казнено поправните домови, ќе има бесплатно учење за децата кои се од особено ранливи категории. Ќе воведеме она што немало до сега, а треба да има, поголема инклузивност, образовни асистенти во средното образование и награди за талентираните ученици, кое исто така до сега го немало, изјави Јаневска.
Предлог законот требаше да биде на дневен ред на комисиска расправа во Собранието, но сепак ќе се почека во овој дел, бидејќи Владата реши да го повлече на доработување.
Матеја Петровски
