Народната банка ја задржа основната камата на 4%. Гувернерот Трајко Славески информира дека и покрај намалувањето на инфлацијата, кризата на Блискиот Исток ги сопре плановите за олабавување на монетарната политика. Славески вели дека будно се следи состојбата и се анализираат механизмите кои можат да се активираат за борба против инфлацијата. Според него, шокот е поголем од оној во 2022-рата година и Македонија не може да остане изолирана. Вели дека лекциите од минатото биле научени и надлежните ќе се трудат македонската економија да помине без големи последици.
„НБМ е подготвена да одговори со сите возможни механизми на предизвиците. Ваквите кризи, енергетските шокови се тешка задача за носителите на економските политики. Шокот може само делумно да се апсорбира“ – вели Славески.
Македонија влезе во глобалната нестабилност со добри перформанси во банкарскиот сектор. Нивото на девизни резерви е стабилно и за 70% поголемо од она во предпандемичниот период. Освен тоа, отпорноста на банкарскиот сектор била зголемена, со високо ниво на адекватност на капиталот од 19,4% и ниско учество на нефункционалните кредити од 2,8%. Сепак, ако кризата продолжи, проекциите за инфлација и економски раст ќе бидат ревидирани.
„Народната банка располага со девизни резерви кои се за околу 70 проценти повисоки од пред пандемијата, односно околу 5,5 милијарди евра што е значајно за стабилноста на девизниот курс. Имавме мала конверзија на денарски депозити во странска валута во првата недела по конфликтот, но тоа веќе се нормализираше. Депозитите се стабилни, па дури и растат. Можно е зголемената цена на нафтата да се одрази врз трговското салдо и потребата од финансирање преку девизните резерви“, рече Славески.
Министерката за финансии вели дека буџетот се полни согласно предвиденото. Приходите до 19-ти март биле поголеми за 12,4%. Од нив, од даноци се собрале за 14,5% повеќе отколку истиот период лани. Димитриеска Кочоска вели дека сепак, обврските за враќање на 8 милијарди евра од претходната влада во следните 4 години притискаат врз буџетот.
„1% каматни трошоци сме имале во 2022 година, сега имаме 2%. Тоа се повеќе 160 милиони евра. Сега замислете овие 160 милиони евра да ги имаме денес какошто ги имало во 2022 и да можете да реагирате“ – вели Димитриеска Кочоска.
ММФ и ЕЦБ сугерираат владите да носат краткорочни и таргетирани мерки, главно за помош на граѓаните и секторот на превозници. Министерката за финансии вели дека токму тоа и се прави, односно се стартуваше со намалување на ДДВ кај горивата. Алармира дека несоодветни мерки можат дури и да ја покренат инфлацијата нагоре.
