Деканот на Медицинскиот факултет во Скопје, Светозар Антовиќ, и раководителот на Институтот за судска медицина, Александар Станков, денеска соопштија дека, по трагичниот инцидент во Кочани, во многу краток рок биле завршени 59 обдукции и идентификации на починатите.
Како што истакнаа на прес-конференцијата, формирани биле шест тимови, составени од експерти од Судска медицина, патолози и тимови од МВР.
Кај сите настрадани е утврдена насилна смрт од задушување, што директно е предизвикано од пожарот.
Очекувањата се дека сите извештаи за обдукциите ќе бидат завршени до крајот на март.
Облеката и сите предмети најдени кај починатите се на Институтот и ќе бидат предадени во Обвинителството.
Според Станков, веднаш по добивањето на информациите за несреќата, сите вработени во Институтот пристигнале на своите работни места за само еден час и бил изработен план за соодветно дејствување. Обдукциите се извршувале на по 15 лица, кои потоа биле предадени на погребалното претпријатие.
„Целта беше брзо и квалитетно да се завршат обдукциите кои започнаа вечерта на 16 март и завршија претпладнето на 18 март, како и точна и прецизна идентификација“, истакна Станков.
Тој, заедно со деканот на факултетот, изрази сочувство до семејствата на починатите и посака побрзо закрепнување на повредените кои се хоспитализирани.
