Македонија има свои симболи – химна, грб и знаме и секој мора да ги почитува. Министерството за образование подготви нов закон за средно образование со кој меѓу другото е предвидена интонација на македонската химна во сите државни училишта за време на значајни настани, празници и патронати. Законот ја помина првата фаза-комисиската.
ДУИ најавува блокада, а ова според Весна Јаневска е само обид за популизам.
“И во овој момент ништо друго не се дискутира освен химната што не е предмет за дискусија. Па оттука, можам да речам дека е комплимент за Министерството што не е најдена друга мана, но сметам дека е крајно неразумно да се запре законот за средно образование кој не е менуван повеќе од 20 години, да не може да се имплементираат новините кои државава ги очекува минимум седум години, а очигледно и повеќе, поради една таква дискусија. Денес е Законот на дневен ред на собраниска седница,, рече Јаневска.
За ДУИ законот е класичен пример со кој власта сака да ја наруши мултиетничноста во државава, според нив се воспоставувала етничка доминација, најавија повеќе од 10.000 амандмани.
„Предлогот со кој се бара интонирање на државната химна во секоја активност и на почетокот и на крајот на учебната година е мерка која ни изгледа навистина неразумна, ја почитуваме химната, но не и одредба што го зголемува притисокот. врз учениците Албанци поради тоа што во државната химна не се споменува ниту еден елемент од нашиот културен идентитет“ – изјави Рина Ајдари.
Против новиот закон е и пратеникот од СДСМ, Фатмир Битиќи кој го оцени како популистичка мерка на власта. Битиќи потенцира дека доаѓа во отсуство на реални предлози и реформи во образованието.
„Впрочем, тоа е доказ за нефокусираноста на оваа Влада, всушност концептот што треба да се прави во образованието. Како еден од пратениците од опозицијата прашувам што ќе донесе ова законско решение што сакаат да го спроведат за подобрување на рангирањето на нашата држава” истакнал Битиќи.
Интонирањето на химанта е само еден дел од законот кој предвидува длабоки реформи во средното образование. Во него се опфатени голем број нови програми со кои на учениците ќе им се овозможи стекнување на стручни компетенции кои ќе ги квалификуваат на пазарот на трудот.
Даниел Ѓорѓевски
