Голем пожар доцна синоќа ги вознемири граѓаните во Скопската населба Кисела Вода. Пожарот изби вечерта околу 1 и 30 часот во депото на Македонски железници транспорт, а оние кои први го забележаа веднаш ги алармираа надлежните. За среќа нема повредени.
За брзо време триесетина пожарникари излегоа на терен и успешно се справија со огнената стихија. Командирот на противпожарната служба Звонко Томевски рече дека пожарот бил многу силен и дека пожарникарите гледале што побрзо да го изгасат и излезат од депото.
„За среќа немаме повредени. Интервенцијата се одвиваше успешно. Имавме континуирано достава на вода, како средство за гаснење. Само што материјалната штета ќе се утврдува дополнително“, рече Звонко Томевски командирот на скопската противпожарна бригада.
Во гаснењето на пожарот учествуваа триесетина пожарникари и интервенираа со десет противпожарни возила. Томовски рече дека пожарот бил изгаснат и ставен под контрола и дека во моментов се работи на расчистување на теренот.
„Станува збор за пожар од поголем обем, каде што беа опожарени повеќе вагони. Веднаш е побарана дополнителна помош, така да интервенирано е вкупно со 10 противпожарни возила со 30 пожарникари. Пожарот е ставен под контрола и сега се работи на расчистување и доизгаснување“, рече Томевски.
Во депото се чувале стари и неисправни вагони, а според првичните информации причинета е материјална штета која ќе се утврдува од надлежните.
Полицијата веднаш излезе на терен. Се прегледуваат надзорните камери за да се утврди што точно се случило и како настанал пожарот во депото на Македонски железници транспорт.
Љубиша Владимиров