Историско зголемување на платите во образованието. Најмалку 46, а можеби и до 60 проценти поголеми примања во следните четири години ќе добијат вработените во основното и средно образование, најави премиерот Христијан Мицкоски. Вели според постигнатиот договор со СОНК конечно образовниот кадар ќе го добие она што го заслужува.
-Минимум 46 проценти ќе имаат наставниците во основното и професорите во средното образование, споредено со сега, минимум, а може повеќе да биде во зависност од состојбата на буџетот. Така што, зголемувањето ќе се движи од 46 до 60 проценти, во зависност од состојбата во буџетот, нешто што е историски, што никогаш до сега не било направено. Исто така и колективниот договор ќе се прави, изјави Мицкоски.
Зголемувањето на платите нема да биде само за професорите и наставниците, туку за сите вработени во училиштата. Првата повисока плата ќе биде октомвриската, која ќе ја добијат на стартот на следниот месец, а етапно ќе се зголемува секоја година до 2028-ма, со секоја мартовска плата.
-Октомвриската плата која што ќе биде исплатена сега во ноември ќе биде повисока за пет проценти, потоа почнувајќи од мартовската плата 2025-та, која што ќе биде исплатена во април 2025-та седум проценти дополнително зголемување, од март 2026-та меѓу 7,5 и 10 проценти во зависност од состојбата на буџетот, март 2027-ма повтормо помеѓу 7,5 и 10 проценти и март 2028-ма помеѓу 10 и 12,5 проценти, изјави Мицкоски.
Мицкоски најави дека после зголемувањето на пензиите, обезбедените средства за програмите за млади, после консолидирањето на исплатата на субвенциите на земјоделците, сега и зголемените плати на образовниот кадар, следно е зголемувањето на платите на вработените во здравството. Вели приорирет на Владата да има повеќе за сите, бидејќи интересот на граѓаните за нив бил најважен.
Матеја Петровски
