Следува историска промена на пазарот на недвижности. Од 1-ви декември, граѓаните кои првпат купуваат стан ќе имаат значително полесен пристап до кредити. Со само 10 проценти сопствено учество, првото живеалиште станува достижна реалност за илјадници семејства и поединци.
Ова е резултат на новите мерки што ги усвои Народната банка, насочени директно кон решавање на долгогодишниот проблем на младите и на сите што досега немале сопствен кров над глава. За прв пат, купувачите на прво живеалиште ќе добијат приоритет, а инвеститорите во втор и трет стан ќе се соочат со построги услови.
Со новите правила, граѓаните кои немаат имот на свое име, ќе можат да аплицираат за кредит со само 10% сопствено учество. За сите останати – сопственици на недвижнини и инвеститори – минималното учество скока од 15 на 25 отсто.
Надлежните велат дека целта е двојна – да им се помогне на младите и на лицата без сопствен дом да стигнат до прв стан, но и да се стави крај на нереалното и вештачко надувување на цените на становите, особено во Скопје.
„Ова не е само економска мерка, туку социјална обврска. Наш приоритет е да им дадеме шанса на тие што ја немаат, а не да го поддржуваме пазарот за профит на сметка на обичните граѓани. Мерките се прецизни, проверени и ќе важат само за оние што навистина немаат имот“ вели гувернерот на Народната Банка Трајко Славевски.
