Исти продукции, исти луѓе, секогаш избирани на конкурсите во Агенцијата за филм. Затворениот круг кои се состои од само пет најдебело финансирани продукции, досега се офајдил 666 милиони денари, односно безмалку 11 милиони евра, народни пари.
Меѓу нив, „Скопје филм студио“ на Томи Салковски, „Црна Мачка“, на неговиот внук, Кристијан Буровски. „Лист Продукција“ на Марија Димитрова, партнерка на Игор Иванов – Изи. „Сектор Филм“, на Владимир Анастасов, како и „Сестри и брат Митевски“ на семејството Лабина, Теона и Вук Митевски.
Она што ги спојува дел од овие продукции се родниниски или бизнис релации со оние во Агенцијата за филм кои одлучувале кому ќе му бидат доделени пари – политички врски со претходната власт, со години неемитување на филмски дела кои биле снимени со средства од државниот буџет, па дури и успеси на конкурси за трошење народни пари, користејќи фалсификат документи.
Истражувањето на Алфа покажува дека на конкурсите на Агенцијата за филм најголем дел од колачот секоја година одел кај истите луѓе. На еден ист конкурс, овие продуценти често добивале финансиска поддршка и за повеќе од еден проект, а ако не успеале да се приграбат до народони пари во првиот повик, Агенцијата не заборавал да се корегира и да им додели пари подоцна во годината. Според Министерството за култура, тоа се случивало затоа што во филмскиот фонд имало судир на интереси.
- Ваквите постапки упатуваат на очигледна селективност при постапувањето на управниот одбор на Агенцијата за филм при носењето одлуки кои се однесуваат на различни продуцентски куќи, со што се нарушува основниот принцип на еднаква примена на законите кон сите прдуцентски куќи. –Пишува во надзорниот извештај на Министерство за култура за работата на Агенција за Филм.
ТВ Алфа дојде и до документи од Министерството за култура, во кои стои дека во Агенцијата за филм, додека со неа директорувал Бојан Лазаревски, еклатантно се прекршувале законите и оти постои сомниение за кривична одговорност.
- Во 2022 година, Агенцијата за филм по конкурсите за финансирање на филмски проекти од национален интерес, распределила средства во износ од 330.906,250,00 денари (двојно повеќе од средствата предвидени за филмска дејност во буџетот), со што не само што го оштетиле буџетот, туку го загрозила остварувањето на филмската дејност во следните пет години. – Стои во надзорниот извештај на Министерство за култура за работата на Агенција за Филм
Освен продукциски куќи кои се под сомнеж дека незаконски добивале народни пари, Министерството за култура утврдило и делење на буџетот по фестивали, за кои во Агенцијата за филм постоел судир на интереси, како „Златна рамка“ или пак фестивали, кои трошеле пари спротивно на договорот, а институцијата не мрднала со мал прст, како „Браќа Манаки“. Под сомнение е и Друштвото на филмски работници, кои според Култура, немаат оправдание како потрошиле 3 милиони денари, бидејќи 2 години по ред до Агенцијата не доставувале изештаи за парите кои им биле доделени.
Никола Цветкоски
