15 цариници митаџии, полицаец и уште 13 макроа и дилери се дел од криминалните групи што само оваа недела паднаа во рацете на МВР, но ова е само почеток на засилената броба против организираниот криминал во земјава. Вака дел од познавачите ги оценуваат последните големи акции, а во блиска иднина очекуваат разбивање и на други групи. Според поранешниот началник Љубомир Ѓурчевски, организираниот криминал ќе се стави под контрола.
Цариници кои со години земале мито се дел од институциите на системот во кој царувал криминал без никој да преземе нешто, коментира поранешниот началник. Исто така, апсењата на макроата од Западна Македонија кои подведувале девојки и организирале дилање дрога, ќе ги запре уличните пресметки на ситните дилери коишто се пукаат по улици, прогнозира Ѓурчевски.
Според детали од истрагата за нелегалната проституција во Западна Македонија, главниот осомничен го организирал криминалот со помош на неговиот брат, кој управувал со два струптиз клуба во Тетово.
Трет осомничен раководел со стриптиз клуб во Охрид, каде што странски државјанки биле наведувани на проституција. Четвртиот осомничен бил задолжен за организирање на патувањето на девојките во Македонија и нивниот престој.
Пет лица од криминалната мрежа ги снабдувале со дрога и клиентите и девојките кои работеле во клубовите.
Дел од криминалната група се и затворски службеник од Тетово и виш инспектор од локалната полиција.
Цариниците, пак од акцијата под кодно име „Премин“примале поткуп од 20 до 150 евра,а ниту ја пресметувале и наплатувале царината. Меѓу нив има и полицаец, а според доказите на МВР, митото си го делеле меѓусебно.
Минатиот месец во рацете на полицијата падна и струмичкиот бизнисмен Ристо Крмзов. Во неговите фирми влегоа УЈП, Министерство за фианнсии, обвинителството и полициски инспектори. На Крмзов судот му го одземе пасошот, а обвинителството допрва треба да строчи обвинение за затајување на данок и перење на пари.
