Редици од автомобили долги километри, нервозни туристи и со саати чекање во место. Ова е сликата која се почесто се гледа на граничниот премин Евозни во пресрет на летната сезона, а особено за продолжените празнични викенди. Новите правила за влез и излез во ЕУ, прават дополнително притисок врз веќе оптоварениот граничен премин. За да се намалат гужвите на граничните премини Грција ќе воведува пакет мерки со кои ќе се забрзаат контролите и ќе се намали чекањето на граница. Одлуката била донесена на работна средба во Солун, свикана од заменик-министерот за внатрешни работи на грција, Констандинос Гулекас, на која присуствувале претставници на институции, безбедносните служби и локалните власти.
„Фактот дека, покрај контролата на патните документи што е надвор од надлежноста на пасошките служби за оние што доаѓаат од трети земји, односно земји кои не припаѓаат на Европската Унија и нејзината зона, за жал е тоа што, заедно со контролата на патните документи, според директива на Заедницата мора да се врши и контрола на биометриските податоци. Значи, ова важи за цела Европа и, покрај проверката на пасошите, треба да се проверуваат и бојата на очите, бојата на косата, обликот на лицето и сите биометриски карактеристики што ја идентификуваат една личност. Тоа значи дополнително време и дополнителни доцнења.“- вели заменик-министерот за надворешни работи, Констандинос Гулекас.
По вонредниот состанок во Солун, тимови од надлежните грчки институции се на терен на граничните премини Евзони со Македонија и „Кипи“ кон Турција, со цел да се утврдат најчестите проблеми за да се најде соодветно решение за нив.Неколку опции се на располагање, велат грчките власти.
„Првата опција е максимално да се зголеми капацитетот на луѓето кои ја вршат контролата. Втората опција е да се зголеми брзината на информатичкиот систем.“- вели Гулекас.
Дополнителен проблем, според грчките власти претставува и застарената инфраструктура на дел од граничните премини која тешко се справува со огромниот број на возила во текот на летните месеци. Од таму стравуваат дека долгите чекања би можеле и негативно да влијаат врз туристичката сезона особено ако метежите продолжат и понатаму.
Само за време на викендите, преку Евзони поминуваат десетици илјади туристи од Балканот кои патуваат кон грчките летувалишта.
