На први септември ќе тргне градскиот воз. Последните коориднации се во тек, за десетина дена ќе биде подготвен возниот ред, а на 21-ви август проектот треба да добие и технички прием. Целта е да се олесни секојдневното патување на скопјани од Зелениково до Центар преку Драчево и Ново Лисиче.
Вицепремиерот и министер за транспорт Александар Николоски најави дека за градскиот воз ќе бидат ставени на располагање најновите железнички гарнитури со кои располага државата – две електрични и една дизел локомотива.
- „Имаме координација помеѓу Министерството за транспорт, Железници инфраструктура, Железници транспорт, Град Скопје и ЈСП. Една од точките се и возните редови, затоа што сакаме да ги усогласиме со ЈСП. Нашата основна цел ќе биде тие да одговараат на учениците, пред сè на средношколците, затоа што сум убеден дека многу средношколци ќе го користат градскиот воз, особено поради тоа што околу железничката станица има неколку средни училишта“, рече Николоски.
Дополнително градскиот метеж сигурно ќе го олесни и набавката на нови 150 електрични автобуси од кои најголемиот дел ќе бидар за превоз во главниот град. До крајот на годинава се очекува да стигнат првите 30. Николоски вели дека според јавната набавка, планирано е целата постапка да заврши за година и пол.
- „Заврши процесот на жалба, така што овој пат процесот е целосно завршен, сега влегуваме во процес на потпишување на договор, иако рокот на испорака е 6 месеци од денот на потпишување на договорот, моето барање од понудувачот е првите автобуси да стигнат во декември месец,“ рече Николоски.
Според министерот за транспорт, со најголемиот грант досега за Македонија од речеси 150 милиони евра ќе биде завршена изградбата на источниот дел од железничкиот Коридор 8. Обезбедени се и 350 милиони евра поволни кредити од Европската инвестициска банка и Европската банка за обнова и развој, со што целосно е затворена финансиската конструкција за изградбата на третата делница од пругата кон Бугарија.
