Гордо простумејќи, но и со длабок наклон и почит за саможртвата на одважниците кои во воената 1941-ва храбро се кренаа против фашистичката окупација на Македонија, херојски Прилеп достоинствено ја чествува 83-тата годишнина од почетокот на народното вооружено востание. Светол, но и крвав датум од поновата, инаку многувековна бурна македонска историја, а нераскинливо поврзан со градот – првоборец Прилеп, од каде, во мугрите на тоа „црвено“ октомвриско утро, со нападот на градот и на бугарскиот Затвор – Участакот од страна на Прилепскиот партизански одред „Гоце Делчев“, започна Македонското вооружено востание против окупаторите и фашизмот. Овој настан е важен меѓник во борбата за самобитност и самостојност на македонскиот народ преку кој Македонија не станала квислиншка територија, туку жешко подрачје за фашистичкиот окупатор.
„Тој победнички истрел кој што се случил тука во Прилеп на 11-ти Октомври 1941 год., не бил само симболичен чин. Напротив, тоа било едно автентично сведоштво на определбата на македонскиот народ да се истрае на балканската ветрометина и од почетокот на борбата, па се до победата над фашизмот на 9 мај 1945 год. да биде на страната на антихителровската коалиција“, – рече Рубин Белчески од ОО на Сјузот на борци од Прилеп.
„Прилеп, градот-херој гордо стои како споменик на непокорот, храброста и борбата за слобода. 83 години од почетокот на отпорот, односно од почетокот на борбата против фашистичката окупација во Македонија, го покажува духот на нашиот народ. Духот кој што ни остава една традиција да се надградуваме и секогаш со сплотеност и сложност да можеме да се спротиставиме на сите предизвици кои што ја затекнаа нашата Македонија“, – истакна Борче Јовчески, градоначалник на Прилеп.
„Нашата обврска е да продолжиме да ја градиме традицијата и да ги одржуваме и сите добрососедски односи, и нормално, и да ја зачуваме нашата Република Македонија“, – порача Цветан Трипуноски, министер.
Пред моштите на паднатите борци во Алејата на Могилата на непобедените во Прилеп, денеска, за првпат, се поклонија и членови на извесни антифашистички здруженија од Србија, Хрватска и Словенија.
„Дојдовме денеска овде за заедно со вас да го отпразнуваме вашиот празник, да ве поздравиме и да ви ги пренесеме нашите темелни цели, а тоа е пред се’, трајното наследство кое што сме го наследиле од минатите времиња во борбата против фашизмот“, – вели Мијо Миљак, потпретседател на Друштвото „Јосип Броз-Тито“ од Пула.
„Мислам дека би требало многу повеќе да соработуваме. Нашите антифашистички организации од нашите шест републики, би требало многу повеќе да соработуваат. Најдобар пример е еве нашата соработка со нашите колеги од Словенија и Истра. Ние имаме заеднички корени и заедно сме се бореле за оваа крвава слобода која денес сите ја уживаме“, – кажа Борис Петковиќ, генерален секретар на Југословенскиот центар „Тито“ од Белград.
Инаку, Прилеп во текот на НОБ учествивал со 8.000 активни борци и со околу 650 жртви. Од нив 154 се носители на партизанска споменица, а 15 се прогласени за народни херои.
Каролина Дурло
