Кавадаречкиот гигант, поранешниот комбинат „Фени“, повторно ќе се активира, најави градоначалникот на Кавадарци, Митко Јанчев. Компанијата „Голден Игл“ – поранешно „Фени“, во првата фаза ќе врати на работа 170 работници, по што следува втора фаза со вклучување на дополнителни 500 луѓе, напиша Јанчев во објава на Фејсбук.
Градоначалникот подвлече дека во април бил планиран почетокот на производството на никел, при што производствените печки ќе бидат ставени во функција. Добрата соработка помеѓу „Голден Игл“, Општина Кавадарци, како и со Владата и премиерот Христијан Мицкоски, овозможија оваа фабрика повторно да биде активирана и ставена во функција за доброто на граѓаните и локалниот економски развој, напиша Јанчев.
