Македонските граѓани се чекор поблиску до ЕУ роаминг без дополнителни трошоци. Министерството за дигитална трансформација информираше дека измените и дополнувањата на Законот за електронски комуникации се влезени во владина процедура. Со овие измени, Македонија ги исполнува правните обврски за усогласување со европските стандарди во областа на роамингот, со цел поголема заштита, поголема транспарентност и пониски и предвидливи трошоци за граѓаните при користење мобилни услуги во роаминг во земјите членки на Европската Унија.
Македонија веќе е дел од регионалниот договор за роаминг во Западен Балкан, со кој граѓаните користат мобилни услуги во земјите од регионот под услови како дома, без дополнителни роаминг-трошоци.
Министерството за дигитална трансформација очекува дека Владата ќе го утврди текстот на законот до крајот на месецот, а во февруари тој ќе се најде во собраниска процедура и ќе биде усвоен.
Оттаму велат дека со овој чекор се исполнуваат условите за постигнување на исти трошоци за повици, пораки и интернет пакети за македонските граѓани кога тие патуваат или престојуваат во ЕУ. По ова, ќе следува донесување на три подзаконски акти од Агенцијата за електронски комуникации, по што сите овие активности ќе бидат споделени со Европската комисија на нивна валидација.
