Шумскиот пожар кај Радовиш ставен под целосна контрола. Иако има спорадични пламени, пожарот не може да се шири и да зафати нови површини. Критично беше вчера, кога огнот, во близина на селото Штурово над Радовиш, на планината Плачковица, се закануваше да ги зафати блиските куќи и викендици. Од друга страна, се уште гори во близина на штипските села Драгоево и Селце. Поради екстремно непристапниот терен, на денешниот координативен состанок на Кризниот штаб, се донесе одлука да се бара и помош од воздух. Во моментот гори месноста Штркалево, кај полигонот Пенуш. Дополнителен проблем е неиспуканата муниција, која синоќа се активирала, поради што противпожарните еклипи биле повлечени од теренот ..
- „Потребно е делување од воздух за да се изгасне и локализира оваа огнена стихија . она коешто ние го имаме како план е да се насочи, да се контролира огнот и пожарот којшто на овие локации веќе неколку денови е ективен„ изјави Иван Јорданов, градоначалник на Штип.
- „Бидејќи на воениот полигон е ризично за дејствување имаме неиспукана муниција само ја следиме состојбата и чекаме поддршка од воздух„ изјави Благој Ренџов, командир на ППЕ-Штип.
Високите температури и правецот на ветрот, се добар сојузник на огнената стихија која беснее по тешко пристапниот терен. Изутрината екипата на Алфа, ги посети овие две села, во подножјето на планината Серта. Огнот не се гледа со голо око, но длабоко во ридовите се забележува густиот чад кој сее страв меѓу месното население.
- „Се плашиме, ако огнот ни дојде од запад може и селото да ни изоре. Штом дувне ветрот и сонцето огрее пак почнува да чури во планината. Има полиција, војници..мислам дека работата ја држат под контрола. Многу жално, изгоре цел рид. Овде имаше борова шума, пошумена во педесетите години„ велат жителите на селата Драгоево и Селце.
Штипскиот градоначалник денеска упати апел до сите граѓани доколку можат и се чувствуваат подготвени, доброволно да се вклучат во борбата со огнената стихија.
Александра Ристевска
