Се проширува позитивната листа на лекови. Наскоро Клексаните ќе може да се подигнат на рецепт во аптеките, наместо да се бара рефундација на платените сретства. Директорот на Фондот за здравствено осигурување, Сашо Клековски денеска ги најави измените во правилниците за позитивната листа на лекови.
„Во прв план ни е префрлањето на антикоагулансите, бидејќи тие се веќе на болничката листа. Значи да не се рефендира веќе Клексанот туку да може да се подигне на рецепт. Се надевам дека час поскоро чим комисијата почне да функционира и се направат овие измени на правилниците, дека ќе ја имаме првото зголемување со Антикоагуланс“, изјави Клековски.
Клековски истакна дека за таблетарниот антикоагуланс, Ксарелто, се уште нема договор, бидејќи производителите засега не сакаат да го вклучат на позитивната листа. Фондот побарал да се направат две клучни измени во правилникот.
Прво да се овозможи преместување на лековите од болничката на аптекарската позитивна листа, а второ Фондот да добие право за преговарање на цените на лековите кои се субвенционирани. Клековски додаде дека лековите кои се на позитивната листа треба да бидат достапни по пониска цена, со цел субвенциите да имаат реален ефект.
„Сметаме дека кога веќе државата обезбедува субвенции за продажбата на одреден лек кој е на позитивната листа, фондот треба да има право да преговара со производителот и дистрибутерот за неговата цена, а не тоа да биде автоматски големопродажната цена“, изјави Клековски.
Минатата година во септември позитивната листа беше дополнета со 87 лекови. На листата беа додадени лекови за крвен притисок за срцеви заболувања, анти агреганси, лекови за третман на депресија и за деменција.
Според докторите, ревидирањето на листата на медикаменти, е голем чекор во здравството. Со новите лекови ќе им се олесни на пациентите, но и на лекарите.
Ставањето нови лекови на позитивната листа во пракса значи дека пациентите ќе добиваат посовремени и поевтини лекови на рецепт, на товар на државата, наместо да плаќаатт од џеб и поскапо -често и од други држави. Затоа што листата не беше ажурирана повеќе од една деценија, граѓаните добиваат застарени лекови, иако постојат нови и поефикасни за нивната болест.
Љубиша Владимиров
