Измените во вкупно пет закони за имплементација на „Сејф сити“ треба да се дефинираат до крајот на март. Потоа, пробен период и веќе од први јануари идната година целосна примена на системот Безбеден град. Министерството за внатрешни работи ќе казнува и за погрешно паркирање на сообраќајни ленти, велосипедски патеки, тротоари и зелени површини со автомобили опремени со камери кои директно ќе бидат поврзани со системот.
- „Дел од имплементацијата на „Сејф сити“ ќе бидат и возила кои ќе бидат опремени со паметни камери и при движење на сообраќајници ќе ги констатираат сите погрешно паркирани возила, по што тие ќе бидат процесирани во системот на обработка на податоци“, рече Тошковски.
МВР од почекот на годината започнале со собирање телефонски броеви и е-маил адреси на возачите при самото регистрирање на автомобилите. Ќе има и пробен период од неколку месеци пред почне функционирањето на „Сејф сити“, кога граѓаните прво ќе добиваат пораки со предупредување, пред целосно системот да се стави во функција, вели министерот Тошковски.
- „Во наредните месец дена ќе се работи интензивно на целокупната легислатива и до крајот на месец март ќе ја имаме првата верзија на сите закони кои треба да влезат во владина процедура, а до крајот на април во собраниска процедура“ вели Тошковски.
Проектот „Безбеден град“, кој е во план да биде имплементиран на цела територија на Македонија, е поддржан од УНДП. Меѓународната организација сака да придонесе во намалување на бројот на жртвите од сообраќајни незгоди.
Со возилата кои ќе партролираат во главниот град треба да се реши и проблемот на велосипедистите и предизвикот за нивно безбедно движење. Во однос на електричните тротинети, Тошковски вели дека се разгледуваат можни регулации и се надева дека наскоро ќе се дојде до соодветно решение.
